Монгол Улс, БНХАУ-ын төмөр зам, гадаад харилцаа, хил хамгаалах, гааль, иргэн харьяат, боомтын байгууллагуудын төлөөллүүд өнөөдөр /2025.11.14/ цахимаар хуралдаж, Замын-Үүд-Эрээн өртөөний нарийн царигийн 2 дахь замыг холбох асуудлыг хэлэлцлээ.

Монгол, Хятадын Замын-Үүд-Эрээн өртөө нь өнөөдрийн байдлаар өргөн царигийн 2, нарийн царигийн 1 замаар холбогдож, өдөрт дунджаар өргөн царигаар 16 галт тэрэг буюу 41,340 тонн экспортын болон транзит ачааг Хятадын талд хүлээлгэн өгч, нарийн царигаар 7 галт тэрэг буюу 6,972 тонн импортын болон транзит ачааг хүлээж авч боловсруулж байна.

Сүүлийн жилүүдэд Монгол Улс руу орж ирэх импортын ачаа болон Монгол Улсаар дамжих ОХУ, Европын чиглэлд тээвэрлэх дамжин өнгөрөх ачааны урсгал эрс нэмэгдэж байгаатай холбогдуулан Замын-Үүд-Эрээн өртөөг холбосон 1435мм царигтай хос замтай болж, түүнийг дагасан нарийн царигийн паркийн өргөтгөл шинэчлэлтийн ажлыг гүйцэтгэх зайлшгүй хэрэгцээ шаардлага тулгамдаж байна.

Хоёр улсын Засгийн газар хооронд Гашуунсухайт-Ганцмод боомтын хил дамнасан төмөр замыг хамтран барих асуудлаар тохиролцоонд хүрсний үндсэн дээр бусад хилийн боомтуудын хил дамнасан төмөр замын бүтээн байгуулалтыг шат дараатай ахиулахаар харилцан тохиролцсон бөгөөд энэ хүрээнд талуудын холбогдох байууллагууд Замын-Үүд-Эрээн боомтын 1435мм царигтай 2 дахь замыг барих тухай Засгийн газар хоорондын хэлэлцээрийн төслийг тохиролцох зорилгоор цахимаар хуралдаж, ойрын хугацаанд албажуулахаар хамтран ажиллахаа илэрхийллээ.

Тус замыг хамтран барьж, нарийн царигийн хоёр замтай болсноор БНХАУ-ын Эрээн өртөөнөөс хоногт 10 галт тэрэг хүлээж авах боломж бүрдэж, төмөр замын ачаа тээврийн хэмжээ нэмэгдэж, тээвэрлэлтийн хугацаа богиносох юм.